Botnfiskundersøkingar i Barentshavet (norsk sone) vinteren 1997

Abstract

Eit kombinert akustikk- og botntråltokt med sikte på å kartleggja utbreiing, mengde og vekst hos torsk, hyse, blåkveite og uerartene er gjennomført sidan 1981 i Barentshavet. Vinteren 1997 vart dekkinga svært mangelfull p.g.a. stengt russisk sone. Mengdeindeksane er oppjusterte basert på tal for kor mykje som stod i norsk sone og totalområdet i 1996, men justeringane er usikre sidan den delen av bestandane som er funne i norsk sone har variert frå år til år. Talet på 1-3 år gamal torsk er mellom dei høgste i tidsserien, talet på 4-6 åringar er sterkt redusert, medan det framleis er bra med eldre fisk. Indeksen for l år gamal hyse er middels sterk, talet på 2-5 åringar er lågt, medan 6-7 åringane er talrike. Lengde, vekt og tilvekst ved alder er låg både for torsk og hyse. Indeksane for uerartene er låge og stort sett på 1996-nivå. Totalindeksen for blåkveite auka litt frå 1996 til 1997, men det er framleis lite ungfisk.